गुलमोहर

स्वयंपाकघराच्या खिडकीमधून
तुझं बदलणारं रुप पाहत होते,
तुझ्या फांद्यांवर बसून कोकिळा गाणं म्हणू लागली,
अन् तुझे निष्पर्ण देह
कोवळ्या पालवीने फुलू लागले.

एखाद्या बैराग्यासारखं दिसणारं
तुझं उघडं अंग
हिरव्या वस्त्रानं हळूहळू झाकू लागलं..
पण पाहत होते,
अजूनही तुझा आनंद पोटातच होता.
त्या दिवशी अचानक उमललेली दोन-चार फुलं पाहिली
अन् पाहिलं तर तोच केशरी आनंद
आता तुझ्या डोळ्यांत होता....